Stärkung Forschungsstandort Bern

Meine Motion zum Thema Forschungsethikkommission im Kanton Bern habe ich in ein Postulat gewandelt, da das Hauptziel erfüllt ist. Die Regierung ist bereit das Anliegen aufzunehmen und wird die entsprechende Verordnung revidieren.

Im Bernischen Parlament wird berndeutsch gesprochen. Ich schreibe mir die Texte deshalb jeweils so auf, wie ich’s im Rat vortrage. Hier mein Votum:

Ig wetti zerscht churz erkläre was e Forschigsethikkommission überhoupt macht und für was si schteit: Bire normale Behandlig cha dä wo behandlet wird dervo usga, dass wenn die medizinische Sorgfaltspflichte ighalte wäre, dass denn unter de gegäbene Vorussetzige für sis Wohl gsorgt wird. Ir klinische Forschig geit me immer vore Hypothese us, wo dür die Forschig entweder beschtätiget oder äbe nid beschtätiget wird. Ds Urteil vo dere Forschigsethikkommission entscheidet drüber ob es Forschigsprojekt überhoupt cha gstartet wärde oder nid. E Beurtielig isch ou d Vorussetzig derfür, dass me d Resultat später z.B. vo  Zuelassigsbehörde vo Medikamänt oder ou vo renommierte Fachzitschrifte überhoupt anerkennt wärde. Ohni Beurteilig dür die Kommission wird’s schwirig d Resultat vo dere Forschig überhoupt bekannt z mache. Genau drum isch es wichtig, dass die Kommission fachlech uf Top-Niveau funktioniert und grössscht möglechi Unabhängigkeit gniesst. Die Grundvorussetzige si wichtig, damit es Urteil vo dere Kommission anerkannt wird. Relevant isch ou d Gschwindigkeit ir Bearbeitig vo dene Gsuech. Es git en internationale Wettstritt drüber, wie schnäll und wie guet Forschigsprojekt beurteilt wärde. Ds Funktioniere vore Forschigsethikkommission entscheidet hüfig ou drüber, ob zum Bispil z Inselspital i Forschigsprojekt überhoupt ibezoge wird. Funktioniert sie langsam, so chöi sech die Projekt ändlos verzögere, was der Standort Bärn widerum zum Bispil für d Pharmaforschig uninteressant macht. Ds Inselspital verliert somit e Teil vo de Forschigsufräg. Füre Forschigsstandort Bärn isch es vo gröschter Bedütig wie die eigeti Forschigsethikkommission funktioniert, wie si fachlech da steit, wie schnäll si cha seriös schaffe und wie unabhängig si cha funtkioniere. Dr Kanton Bärn het vor Jahre e Pionierrrolle innegha was d‘ Organisation vor Ethikkommission ageit. Sie droht im Momänt dä Spitzeplatz z verliere.  I bi drum froh, dass der Regierigsrat ou gmerkt hat, dass Handligsbedarf da isch. Drum het mini Motion eigentlech scho das bewürkt wo sie hauptsächlech het welle: Ufzzeige, dass Handligsbedarf da isch. Ds Bundesparlamänt het chürzlech z Humanforschigsgsetz verabschidet.  Das heisst, der Rahme steit jetz. Das isch bim Verfasse vo mire Motion no nid ganz klar gsi. D Forschigsverordnig mues jetz zwingend überarbeitet wärde. Drum bini bereit mini Motion z wandle und bitte Euch mit ere dütleche Zuestimmig zum Poschtulat z zeige, dass dir dran interessiert sit, dürne starchi Ethikkommission der Forschigsplatz Bärn z schterche und d Ethikkommission und dermit ou der Forschigsstandort Bärn wettbewärbsfähig z mache.